நாடாளுமன்ற உறுப்பினர் நாமல் ராஜபக்ச சட்டம் தொடர்பான தனது உயர்நிலை கல்வித் தகைமையை மோசடியாக பெற்றதாக குற்றச்சாட்டு எழுந்துள்ளது. இதுதொடர்பாக, இலஞ்சம் மற்றும் ஊழல் தொடர்பான அதிகார சபையின் தலைவர் ஜமுனி காமந்ர துஷாரவினால் இன்று (16.12.2024) குற்றப்புலனாய்வு திணைக்களத்தில் முறைப்பாடு பதிவு செய்யப்பட்டுள்ளது.
ஜமுனி காமந்ர தெரிவித்ததாவது, பரீட்சை நாளன்று நாமல் ராஜபக்ச பரீட்சை முறைகேட்டில் ஈடுபட்டதாக அன்றையதினம் அவருடன் பரீட்சைக்கு தோற்றிய இளைஞர் ஒருவர் முறைப்பாடு செய்துள்ளார்.
அந்த இளைஞர் முறைப்பாட்டை அப்போதைய மண்டபத் தலைவர், சட்டக்கல்லூரி அதிபர், மற்றும் பதிவாளர் ஆகிய பொறுப்பதிகாரர்களிடம் பதிவு செய்துள்ளார். முறைப்பாடு ஏற்றுக்கொள்ளப்பட்டிருந்தாலும், உரிய நடவடிக்கைகள் எடுக்கப்படவில்லை.
இதன் பின்னர், நீதியமைச்சின் அப்போதைய செயலாளர் சுஹத கம்லத்திடம் முறைப்பாடு செய்யப்பட்டபோதும், அது மறுக்கப்பட்டது. மேலும், பொலிஸ் உத்தியோகத்தர்கள் உள்ளிட்ட பல துறைகளிலும் முறையிட்டபோதும், தீர்வு கிடைக்கவில்லை.
இந்தச் சூழலில், முறைப்பாட்டை பதிவு செய்த இளைஞர் தனது பாதுகாப்பு கருதி நாட்டை விட்டு வெளியேறியதால், உரிய சாட்சியங்களைப் பெற்று விசாரணை நடத்த முடியாத நிலை ஏற்பட்டுள்ளது.
தற்போதைய நிலைமைக்கமைய, குற்றப்புலனாய்வு திணைக்களம் விரைவாக நடவடிக்கை எடுத்து, முழுமையான விசாரணையை மேற்கொள்ள வேண்டும் என ஜமுனி காமந்ர வலியுறுத்தியுள்ளார்.
