யாழ். போதனா வைத்தியசாலைக்குள் அனுமதியின்றி பிரவேசித்து, தமது கடமைகளுக்கு இடையூறு விளைவித்ததுடன், தம்மை அச்சுறுத்தியதாக நாடாளுமன்ற உறுப்பினர் இராமநாதன் அர்ச்சுனாவுக்கு எதிராக, வைத்தியர் த. சத்தியமூர்த்தி பகிரங்க குற்றச்சாட்டு முன்வைக்குள்ளார்.
இந்த சம்பவம் தொடர்பான விசாரணைகள் யாழ்ப்பாணம் பொலிஸாரால் முன்னெடுக்கப்பட்டு வருகின்றன. இதன் தொடர்ச்சியாக, பொலிஸார் தங்களின் சமர்ப்பணங்களை யாழ். நீதவான் நீதிமன்றத்தில் முன்வைத்துள்ளனர்.
இலங்கையில், வைத்தியத்துறையைப் பற்றி கடந்த காலங்களில் பல பேச்சுகள் வந்திருந்தாலும், தற்போது இது எதிர்மறையான விமர்சனங்களுக்கு உள்ளாகி வருகின்றது. குறிப்பாக வடக்கு மற்றும் கிழக்கு பகுதிகளில், வைத்தியத்துறை மீது பல்வேறு விமர்சனங்கள் முன்வைக்கப்படுகின்றன.
இந்த நிலையில், யாழ். போதனா வைத்தியசாலையின் பணிப்பாளர், வைத்தியர் சத்தியமூர்த்தி மற்றும் பிரித்தானியாவில் பணியாற்றும் அவசர சிகிச்சைப் பிரிவின் விசேட வைத்திய நிபுணர் வைத்தியர் சதானந்தன், இன்றைய லங்காசிறியின் ஊடறுப்பு நிகழ்ச்சியில் கலந்து கொண்டு கருத்து தெரிவித்த போது, இராமநாதன் அர்ச்சுனா தொடர்பான கருத்துக்களை முன்வைத்தனர்.
