முடி உதிர்வதற்குப் பல காரணங்கள் சொல்லப்படுகின்றன. குறிப்பாக, மன அழுத்தம் மற்றும் மரபணு மாற்றம் ஆகியவை முக்கிய காரணங்களாகக் கருதப்படுகின்றன. சில சமயங்களில், தொப்பி அல்லது ஹெல்மெட் அணிவது, மேலை நாட்டு உணவுப் பழக்கவழக்கங்கள் போன்றவையும் முடி உதிர்வுக்கு முக்கியக் காரணமாக அமைகின்றன.
முருங்கை விதை எண்ணெய்:
முருங்கை விதை எண்ணெய் உச்சந்தலையில் ரத்த ஓட்டத்தைச் சீர்படுத்தும் ஆற்றல் கொண்டது என்று ஆய்வுகள் தெரிவிக்கின்றன. இதில் உள்ள கால்சியம், இரும்புச்சத்து, ஃபோலிக் ஆசிட், ஈகோசெனோயிக் அமிலம் மற்றும் பால்மிடிக் அமிலம் போன்றவை உங்கள் முடி உதிர்வுக்கு முற்றுப்புள்ளி வைக்கும். வாரத்திற்கு ஒருமுறை இந்த எண்ணெயைத் தலையில் தடவி மசாஜ் செய்து, குளிர்ந்த நீரில் குளிக்க வேண்டும். இப்படி ஒரு வாரம் தொடர்ந்து செய்து வந்தால், நல்ல மாற்றத்தை நீங்களே காணலாம்.
புகை மற்றும் மதுப் பழக்கங்கள்:
முடி உதிர்வு இருக்கும்போது புகைப்பிடித்தல் மற்றும் மது அருந்துதல் பழக்கங்கள் இருந்தால், அவற்றைத் தவிர்ப்பது நல்லது. ஏனெனில், இவை உச்சந்தலையில் ரத்த ஓட்டத்தைக் குறைத்து, முடி வளர்ச்சியைப் பாதித்து, முடி உதிர்வை அதிகரிக்கின்றன.
மன அழுத்தமும் முடி உதிர்வும்:
முடி உதிர்வுக்கு மன அழுத்தம் ஒரு முக்கிய காரணமாகும். கவலை, கோபம் மற்றும் பதற்றம் ஆகியவை உடலில் நோய் எதிர்ப்பு சக்தியைக் குறைத்து, மன அழுத்தத்தை அதிகரிக்கின்றன.
யோகா, மூச்சுப் பயிற்சி:
யோகா மற்றும் மூச்சுப் பயிற்சி போன்றவற்றைத் தொடர்ந்து செய்வதால் மன அழுத்தம் குறைந்து, ஹார்மோன்கள் சமநிலை அடைகின்றன. இதனால் முடி உதிர்வு கட்டுக்குள் வரும்.
ரசாயனங்கள் நிறைந்த ஷாம்பூக்கள்:
அதிகப்படியான முடி உதிர்வுக்கு நீங்கள் பயன்படுத்தும் ஷாம்பூ கூட காரணமாக இருக்கலாம். ஆம், அதில் கலக்கப்படும் ரசாயனக் கலவைகள் முடி உதிர்வுக்கு முக்கியப் பங்கை வகிக்கக்கூடும். எனவே, ஆல்கஹால் மற்றும் அதிக வேதியியல் ரசாயனங்கள் நிறைந்த ஷாம்பூக்களைத் தவிர்ப்பது நல்லது.
