இலங்கையின் மூத்த திரைப்பட இயக்குனர் சோமரத்ன திசாநாயக்கையைப் போல நடித்து, இளம் பெண்களைப் பாலியல் ரீதியாகத் துன்புறுத்தி, அவர்களிடமிருந்து பண மோசடி செய்த ஒரு நபர் பிணையில் விடுவிக்க நீதிமன்றம் உத்தரவிட்டுள்ளது.
இந்த வழக்கில் விளக்கமறியலில் வைக்கப்பட்டிருந்த பொல்கஹவெல அஞ்சல் துறை ஊழியர் ஒருவரைப் பிணையில் விடுவித்து கொழும்பு பிரதான நீதவான் தனுஜா லக்மாலி ஜெயதுங்க நேற்று (21) உத்தரவிட்டார்.
இளம் பெண்களை பாலியல் ரீதியாக துஷ்பிரயோகம்
சந்தேகநபரான இசுரு மதுமல் கருணாதாசவை ஒரு மில்லியன் ரூபாய் தனிப்பட்ட பிணையில் விடுவிக்குமாறு உத்தரவிடப்பட்டது. இந்தச் சம்பவம் தொடர்பில் மேலும் தெரியவருவதாவது:
சோமரத்ன திசாநாயக்கையைப் போல நடித்த குற்றங்களை ஒப்புக்கொள்ள தான் தயாராக இருப்பதாகவும், அவருக்கு ஏற்பட்ட அவமானம் மற்றும் நற்பெயருக்கு ஏற்பட்ட களங்கத்திற்காக மன்னிப்பு கேட்கத் தயாராக இருப்பதாகவும் சந்தேகநபர் நீதிமன்றத்தில் தெரிவித்தார்.
சோமரத்ன திசாநாயக்காவின் நற்பெயருக்குப் பெரும் சேதம் ஏற்பட்டிருந்தாலும், சந்தேகநபர் தனது குற்றத்தை ஒப்புக்கொள்ளத் தயாராக இருப்பதால், எந்த இழப்பீட்டையும் எதிர்பார்க்கவில்லை என, சோமரத்ன திசாநாயக்கவுக்காக ஆஜரான வழக்கறிஞர் மனோஜ் கமகே நீதிமன்றத்தில் தெரிவித்தார். எனினும், இந்தச் சம்பவத்தால் சோமரத்ன திசாநாயக்கா மற்றும் பல இளம் பெண்கள் பாதிக்கப்பட்டுள்ளதால், தகுந்த உத்தரவைப் பிறப்பிக்க வேண்டும் என்றும் அவர் கோரினார்.
சோமரத்ன திசாநாயக்க, இந்தச் சந்தேகநபர் இளம் பெண்களைப் பாலியல் ரீதியாகத் துன்புறுத்தியதுடன், திரைப்படங்கள் தயாரிப்பதற்காக வணிகர்களை ஏமாற்றி பணம் மோசடி செய்ததாகவும் கூறினார்.
மேலும், நாட்டின் பல்வேறு பகுதிகளில் இருந்து இளம் பெண்களின் நிர்வாணக் காட்சிகள் வாட்ஸ்அப்பில் பார்க்கப்பட்டதாகவும், அந்தக் காட்சிகள் டெலிகிராம் சமூக ஊடகம் வழியாகப் பணத்திற்காக மற்றவர்களுக்கு விற்கப்பட்டதாகவும் விசாரணையில் தெரியவந்ததாக அவர் தெரிவித்தார்.
முன்வைக்கப்பட்ட உண்மைகளைக் கருத்தில் கொண்ட பிரதான நீதவான், சந்தேகநபருக்கு எதிராக குற்றப்பத்திரிகை தாக்கல் செய்யுமாறு குற்றப் புலனாய்வுப் பிரிவினருக்கு உத்தரவிட்டார். அதே சமயம், சந்தேகநபர் குற்றப்பத்திரிகையை ஏற்றுக்கொள்வதாகவும் குற்றத்தை ஒப்புக்கொள்ளத் தயாராக இருப்பதாகவும் கூறியதால், அவரைப் பிணையில் விடுவிக்கவும் உத்தரவிட்டார்.
