காலியில் உள்ள தல்கஹவத்த பிரதேசத்தில் மாமனாரால் தாக்கப்பட்ட மருமகன் ஒருவர் கொலை செய்யப்பட்டுள்ளதாக கரந்தெனிய பொலிஸார் தெரிவித்தனர். இந்தக் கொலைச் சம்பவம் நேற்று (07) இரவு இடம்பெற்றுள்ளதாக பொலிஸார் கூறுகின்றனர்.
மொரகொட பிரதேசத்தைச் சேர்ந்த 24 வயதான மருமகனே இவ்வாறு கொலை செய்யப்பட்டுள்ளார். கொலை செய்யப்பட்ட மருமகன் தனது நண்பர்களுடன் சேர்ந்து மது அருந்தியுள்ளார்.
பின்னர், போதையில் இருந்த நண்பர்களை அவர்களின் வீடுகளில் கொண்டுபோய் விடுவதற்காக, தனது மாமனாரிடம் முச்சக்கர வண்டியை கேட்டுள்ளார். ஆனால், மாமனார் அதை கொடுக்க மறுத்துள்ளார்.
இதனால் கோபமடைந்த மருமகன், ஒரு கம்பால் வீட்டின் கதவை அடித்து உடைத்ததுடன், தனது மனைவியையும் தாக்க முயற்சித்துள்ளார். அப்போது, போதையில் இருந்த மருமகனைத் தடுப்பதற்காக மாமனார் தனது மருமகனை ஒரு கம்பால் தாக்கியுள்ளார். இதில் காயமடைந்த மருமகன் சம்பவ இடத்திலேயே உயிரிழந்துள்ளார்.
சம்பவம் நடந்ததும், சந்தேக நபராகக் கருதப்படும் 58 வயதுடைய மாமனார் பொலிஸ் நிலையத்தில் சரணடைந்துள்ளார். மேலும், இந்தக் கொலைச் சம்பவம் குறித்த மேலதிக விசாரணைகளை கரந்தெனிய பொலிஸார் தொடர்ந்து மேற்கொண்டு வருகின்றனர்.
________________________________________________________________________
In Thalagahawatta, Galle, a son-in-law was killed by his father-in-law following a dispute over a tuk-tuk. The 24-year-old son-in-law, who was intoxicated, became angry when his father-in-law refused to let him use the tuk-tuk to drop off his friends. The son-in-law then broke the house door and attempted to assault his wife. In an effort to stop him, the father-in-law struck him with a stick, causing his death on the spot. The 58-year-old father-in-law has since surrendered to the Karandeniya Police, who are conducting further investigations.
