படுக்கையில் இறந்து கிடந்த பெண்ணின் சடலம் மீதான பிரேத பரிசோதனையில், அவர் கொலை செய்யப்பட்டிருப்பது உறுதியாகியுள்ளது. இதனையடுத்து, அவரது கணவர் இன்று (15) சந்தேகத்தின் பேரில் கைது செய்யப்பட்டார்.
கொலை செய்யப்பட்டவர், தம்புள்ளை, தித்தவெல்கொல்ல பகுதியைச் சேர்ந்த 34 வயதுடைய, ஒரு குழந்தையின் தாய் ஆவார். அவர் கலேவெல வலயக் கல்வி அலுவலகத்தில் முகாமைத்துவ சேவைகள் அதிகாரியாகப் பணிபுரிந்து வந்துள்ளார்.
இந்தச் சம்பவம் குறித்து மேலும் தெரியவருவதாவது:
கடந்த 13ஆம் திகதி தம்புள்ளை, தித்தவெல்கொல்ல பகுதியில் உள்ள ஒரு வீட்டில் ஒரு பெண் மர்மமான முறையில் இறந்து கிடப்பதாகப் பொலிஸாருக்குத் தகவல் கிடைத்தது. இறந்த பெண்ணின் கணவர், பொலிஸாரிடம் அளித்த வாக்குமூலத்தில், தனது மனைவி தேர்வுக்காகப் படித்துவிட்டு மாலை 4 மணியளவில் தூங்கச் சென்றதாகவும், இரவு 9 மணியளவில் அவரை எழுப்பியபோதும் அவர் எழும்பவில்லை என்றும் தெரிவித்திருந்தார். இதனையடுத்து, அவர் உடல்நிலை சரியில்லாமல் இருப்பதாகக் கருதி 1990 ஆம்புலன்ஸ் சேவைக்கு அழைப்பு விடுத்ததாகவும் வாக்குமூலத்தில் கூறியிருந்தார்.
எனினும், பொலிஸாருக்கு இந்த மரணத்தில் சந்தேகம் ஏற்பட்டதால், முறையான விசாரணைகளை மேற்கொண்டு, இன்று தம்புள்ளை வைத்தியசாலையின் சிறப்பு தடயவியல் மருத்துவர் கே.என்.சி. சேனாரத்னவினால் பிரேத பரிசோதனை நடத்தப்பட்டது. அதில், தலையில் ஏற்பட்ட பலத்த காயங்களால் ஏற்பட்ட உள் இரத்தப்போக்கே மரணத்திற்குக் காரணம் எனத் தெரியவந்துள்ளது.
இருப்பினும், இந்தத் தம்பதியரின் 5 வயது குழந்தையின் சந்தேகத்திற்குரிய நடவடிக்கைகள் மற்றும் குழந்தை மிகவும் பயந்து போயிருந்தமையால், இந்த மரணம் தொடர்பாக மேலும் பல சந்தேகங்கள் எழுந்துள்ளதாகப் பொலிஸார் தெரிவிக்கின்றனர்.
இதன் அடிப்படையில், உயிரிழந்த பெண்ணின் கணவர் கைது செய்யப்பட்டு, கொலை நடந்த விதம் குறித்து மேலும் தகவல்களைப் பெறுவதற்காக அவரிடம் தொடர்ந்து விசாரணைகள் நடத்தப்பட்டு வருகின்றன. கைது செய்யப்பட்ட சந்தேகநபர் தம்புள்ளை நீதிமன்றத்தில் ஆஜர்படுத்தப்பட உள்ளார்.
______________________________________________________________________
A 34-year-old woman from Dambulla, a mother of one and an official at the Galewela Zonal Education Office, was found dead in her bed under mysterious circumstances. Although her husband claimed she died in her sleep, a post-mortem examination revealed she was murdered, with the cause of death being internal bleeding from severe head injuries. Police grew suspicious due to the behavior of the couple’s 5-year-old child and have since arrested the husband. He is currently being interrogated by the police and will be presented before the Dambulla Magistrate’s Court.
