அம்பாறை மாவட்டம், நிந்தவூர் பொலிஸ் பிரிவுக்குட்பட்ட ஒரு வீட்டில் சுமார் 45 இலட்சம் ரூபா பெறுமதியான நகைகள் களவாடப்பட்டுள்ளதாகப் பொய் கூறி நாடகமாடிய ஒரு பெண் கைது செய்யப்பட்டு, பின்னர் பிணையில் விடுவிக்கப்பட்டுள்ளார்.
கடந்த செப்டம்பர் 27ஆம் திகதி, அந்த 32 வயதுடைய குடும்பப் பெண், தனது கணவர் வெளிநாட்டில் இருந்து இலங்கைக்குத் திரும்பவுள்ள நிலையில் இந்தக் களவாடல் சம்பவம் இடம்பெற்றதாக பொலிஸ் நிலையத்தில் முறைப்பாடு செய்திருந்தார்.
விசாரணையில் அம்பலமான உண்மை;
முறைப்பாட்டின் பேரில் நிந்தவூர் பொலிஸ் அதிகாரிகள் விசாரணைகளையும், தடயவியல் பொலிஸ் பிரிவினர் தீவிர சோதனைகளையும் மேற்கொண்டனர். ஆனால், வீட்டில் நகைகள் களவாடப்பட்டதற்கான எந்தவொரு சான்றுகளும் ஆதாரங்களும் கிடைக்கவில்லை. இதனால் சந்தேகமடைந்த பொலிஸார் அந்தப் பெண்ணிடம் தீவிர விசாரணை மேற்கொண்டனர்.
விசாரணையில், கணவர் வெளிநாட்டு வேலைவாய்ப்புக்காகச் சென்ற நிலையில், தனியாக இரண்டு பிள்ளைகளுடன் வாழ்ந்த அந்தப் பெண், தனது கையிருப்பில் இருந்த பணம் மற்றும் நகைகளை பல்வேறு தேவைகளுக்காகச் செலவு செய்ததை ஒப்புக்கொண்டார். இந்த நிலையில், கணவர் திடீரென நாடு திரும்பவுள்ளதாகத் தெரிவித்ததால், பதற்றமடைந்த அவர் நகைகள் களவாடப்பட்டதாகப் பொய் நாடகமாடியுள்ளார். மேலும், கல்முனைப் பகுதியில் உள்ள பிரபல நகையகம் ஒன்றில் நகைகளை விற்பனை செய்ததையும் அவர் ஒப்புக்கொண்டார்.
பொலிஸ் நிலையத்திற்கு அழைத்து வரப்பட்ட அந்தப் பெண் கைது செய்யப்பட்டு, சம்மாந்துறை நீதிவான் நீதிமன்றத்தில் ஆஜர்படுத்தப்பட்டார். முதலில் அவரை 14 நாட்கள் விளக்கமறியலில் வைக்குமாறு நீதிபதி உத்தரவிட்டார். பின்னர், அந்தப் பெண் தனது குற்றத்தை ஒப்புக்கொண்ட நிலையில், நீதிபதி கடும் தொனியில் அவரை எச்சரித்து பிணையில் செல்ல உத்தரவிட்டார்.
In Ampara, a 32-year-old married woman was arrested and later released on bail after fabricating a story about the theft of jewellery worth approximately Rs. 4.5 million. She filed a complaint with the Nintavur Police on September 27, claiming the theft occurred just before her husband’s unexpected return from abroad. Intense police investigation found no evidence of a robbery, leading the woman to confess that she had spent the money and jewellery for her own needs while her husband was away and staged the theft out of panic over his return. The woman was produced before the Sammanthurai Magistrate Court, initially remanded for 14 days, and then released on bail after confessing her crime and receiving a severe warning from the Judge.
