2025 ஆம் ஆண்டு இதுவரை இலங்கைக்கு வருகை தந்த வெளிநாட்டு சுற்றுலாப் பயணிகளின் எண்ணிக்கை 18 இலட்சத்தைக் கடந்துள்ளதாக இலங்கை சுற்றுலா அபிவிருத்தி அதிகார சபை தெரிவித்துள்ளது.
இலங்கை சுற்றுலா அபிவிருத்தி அதிகார சபை வெளியிட்டுள்ள புதிய புள்ளிவிவரங்களின்படி, 2025 ஆம் ஆண்டு ஒக்டோபர் 15 ஆம் திகதி வரையான காலப்பகுதியில் நாட்டிற்கு வருகை தந்த மொத்த வெளிநாட்டுச் சுற்றுலாப் பயணிகளின் எண்ணிக்கை 18 இலட்சத்தைத் தாண்டியுள்ளமை உறுதிப்படுத்தப்பட்டுள்ளது.
இந்த மாதத்தின் முதல் 15 நாட்களில் மட்டும் 75,657 சுற்றுலாப் பயணிகள் இலங்கைக்கு வருகை தந்த நிலையில், இதுவரை வருகை தந்த மொத்தச் சுற்றுலாப் பயணிகளின் எண்ணிக்கை 1,801,151 ஆக உயர்ந்துள்ளது.
இலங்கைக்கு வருகை தந்த சுற்றுலாப் பயணிகளில் அதிக எண்ணிக்கையானோர் இந்தியாவிலிருந்து வந்தவர்கள் ஆவர். அவர்களின் எண்ணிக்கை 4 இலட்சம் எல்லையை நெருங்கி, 396,274 ஆகப் பதிவாகியுள்ளது.
அத்துடன், ஐக்கிய இராச்சியம் (167,886), ரஷ்யா (125,950), ஜேர்மனி (111,677) மற்றும் சீனா (108,040) ஆகிய நாடுகளிலிருந்தும் ஒரு இலட்சத்திற்கும் அதிகமான சுற்றுலாப் பயணிகள் இந்த ஆண்டு வருகை தந்துள்ளனர்.
இதுமட்டுமின்றி, பிரான்ஸ் (90,250), அவுஸ்திரேலியா (81,040), நெதர்லாந்து (53,922) மற்றும் அமெரிக்கா (50,027) போன்ற நாடுகளிலிருந்தும் ஐம்பதாயிரத்திற்கும் அதிகமானோர் வருகை தந்துள்ளனர். இத்தாலி (39,932), கனடா (37,606), ஸ்பெயின் (36,430), போலந்து (36,389) ஆகிய நாடுகளிலிருந்தும் கணிசமான எண்ணிக்கையிலான சுற்றுலாப் பயணிகள் நாட்டிற்கு வருகை தந்துள்ளனர்.
கடந்த ஆண்டு (2024) 20 இலட்சத்திற்கும் (2,053,465) அதிகமான சுற்றுலாப் பயணிகள் நாட்டிற்கு வருகை தந்திருந்தனர். இலங்கைக்கு இறுதியாக அதிகளவான சுற்றுலாப் பயணிகள் வருகை தந்த ஆண்டு 2018 ஆகும். அப்போது 23 இலட்சத்திற்கும் (2,333,796) அதிகமான சுற்றுலாப் பயணிகள் வருகை தந்திருந்தனர். இலங்கையின் வருடாந்த சுற்றுலாப் பயணிகள் வருகை இதுவரை 2016, 2017, 2018 மற்றும் 2024 ஆகிய நான்கு சந்தர்ப்பங்களில் 20 இலட்சம் எல்லையைக் கடந்துள்ளது.
The Sri Lanka Tourism Development Authority (SLTDA) announced that the total number of foreign tourist arrivals to the country in 2025 has surpassed 1.8 million as of October 15, reaching 1,801,151. The highest number of arrivals were from India (396,274), nearly hitting the 400,000 mark. Four other countries—UK, Russia, Germany, and China—also registered over 100,000 arrivals. The report notes that tourist arrivals previously crossed the 2 million mark in 2016, 2017, 2018, and 2024, with the highest figure recorded in 2018 (2.33 million).
